اڈیشہ کے بالاسور ٹرین حادثہ معاملہ کی جانچ کر رہی سی بی آئی نے جمعہ کے روز ایک بڑا قدم اٹھاتے ہوئے 3 ملزمین کو گرفتار کر لیا ہے۔ ان میں بالاسور کے سینئر سیکشن انجینئر ارون کمار مہنتو، سوہو کے سینئر سیکشن انجینئر محمد عامر خان اور پپو ٹیکنیشین شامل ہیں۔ تینوں کی گرفتاری تعزیرات ہند کی دفعات 304 اور 201 کے تحت ہوئی ہے۔
واضح رہے کہ گزشتہ 25 سالوں میں ملک کے سب سے بڑے ریل حادثات میں سے ایک چنئی جانے والی کورومنڈل ایکسپریس، ہوڑہ جانے والی ایس ایم وی ٹی سپرفاسٹ ایکسپریس اور ایک مال گاڑی بہناگا بازار ریلوے اسٹیشن کے پاس ٹکرا گئی تھیں۔ اس دردناک حادثہ میں 292 لوگوں کی موت ہو گئی اور 1000 سے زائد افراد زخمی ہوئے تھے۔
اس حادثہ کے بعد ریلوے نے پہلے سی آر ایس (کمشنر ریلوے سیفٹی) جانچ کا حکم دیا اور پھر سی بی آئی جانچ کا بھی حکم صادر کر دیا گیا۔ حادثہ کے بعد سے ریلوے نے جنوب مشرقی ریلوے کے کئی سرکردہ افسران کا ٹرانسفر کر دیا گیا۔ شروعاتی جانچ میں حادثہ کے ممکنہ اسباب کی شکل میں یا تو لاپروائی سے یا ارادہ سے سگنلنگ مداخلت کی بات سامنے آئی تھی۔
ابھی حال ہی میں سی آر ایس کی ایک رپورٹ بھی سامنے آئی تھی جس میں ٹرین حادثے کے پیچھے انسانی غلطی کی نشاندہی کی گئی تھی۔ رپورٹ میں بتایا گیا کہ ایسے اشارے ملے ہیں کہ اگر گزشتہ تنبیہ کے بارے میں جانکاری دی جاتی تو حادثہ کو ٹالا جا سکتا تھا۔ اس رپورٹ میں کئی سطحوں پر غلطی کی بات کہی گئی ہے۔
